वाशिम : वाशिम जिल्हाधिकारी योगेश कुंभेजकर यांच्या संकल्पनेतून अलीकडेच जिल्हाधिकारी कार्यालयाच्या प्रांगणात सोनकुसुम अर्थात कॉसमॉस फुलांची लागवड करण्यात आली होती. आता या फुलांना बहर आल्याने जिल्हाधिकारी कार्यालयाचा परिसर रंगीबेरंगी फुलांनी सजला असून, या फुलांमुळे परिसराचे सौंदर्य कमालीचे वाढले आहे.
केशरी रंगाच्या या फुलांवर सध्या शेकडो फुलपाखरांची वर्दळ पाहायला मिळत आहे. त्याचबरोबर मधमाशाही मोठ्या संख्येने या फुलांकडे आकर्षित होत आहेत. फुलांवर बागडणारी रंगीबेरंगी फुलपाखरे आणि मधमाशांचा गुंजारव यामुळे प्रशासकीय कार्यालयाच्या परिसरात निसर्गाचा मनमोहक अविष्कार पाहायला मिळत आहे.
कॉसमॉसच्या फुलांमध्ये मुबलक प्रमाणात मकरंद असल्याने फुलपाखरे आणि मधमाशांसारख्या परागीभवन करणाऱ्या कीटकांसाठी ही फुले अन्नाचा महत्त्वाचा स्रोत ठरतात. त्यामुळे या फुलांची लागवड परिसराचे सौंदर्य वाढविण्यासोबतच जैवविविधतेला आणि परागीभवन प्रक्रियेलाही चालना देणारी ठरत आहे.
जिल्हाधिकारी कार्यालयात विविध कामांसाठी येणारे अधिकारी, कर्मचारी आणि नागरिकांचे लक्ष या फुलांनी वेधून घेतले आहे.
प्रशासकीय कामकाजाच्या गजबजाटात उमललेली ही रंगीबेरंगी फुले आणि त्यावर वावरणारी फुलपाखरे नागरिकांना काही क्षण निसर्गाच्या सान्निध्याचा आनंद देत आहेत.
शासकीय कार्यालयाच्या परिसरात निसर्गसौंदर्य आणि जैवविविधतेला प्रोत्साहन देणारा हा उपक्रम वाशीमकरांसाठी आकर्षणाचा विषय ठरत असून, जिल्हाधिकारी कार्यालयाच्या प्रांगणातील हा फुललेला बहर सध्या सर्वांचे लक्ष वेधून घेत आहे.
